ඇමරිකාවේ ඩිමොක්‍රටික් පක්ෂයේ මධ්‍ය වාමාංශික කොටසක් නව දේශපාලන පක්ෂයක් පිහිටුවීමේ කටයුතු අරඹා තිබෙන බව වාර්තා වනවා.
මෙම පිරිස ඩිමොක්‍රටික් සහ රිපබ්ලිකන් ජාතික සම්මේලනවලින් අනතුරුව රැස්වීමට සැරසෙන බවයි ප්‍රකාශ කෙරුණේ.
මෙම කණ්ඩායමේ මූලිකත්වය ගෙන ඇත්තේ ලේඛිකා මාරියාන් විලියම්සන්, ආර්කන්සා ප්‍රාන්තය නියෝජනය කළ හිටපු ඩිමොක්‍රටික් සෙනට් සභික මයික් ග්‍රැවල්, 2020 බයිඩන් ජනාධිපතිවරණ ව්‍යාපාරය මෙහෙයවූ නීනා ටර්නර් සහ ආචාර්ය කෝර්නෙල් වෙස්ට් යන පිරිසයි.
ජනතාවාදී පක්ෂයක් සඳහා වන ව්‍යාපාරය නමින් තමන්ව හඳුන්වා දෙන මෙම පිරිස කියා සිටින්නේ සමාගම්වලට යට නොවූ, ජනතා අභිලාෂයන් නියෝජනය කරන දේශපාලන ව්‍යාපාරයක් නිර්මාණය කිරීම තම ඉලක්කය බවයි.
ඩිමොක්‍රටික් පක්ෂය සිය වාමවාදී කඳවුර කොන් කිරීමට ලක් කරන බවයි මෙම කණ්ඩායම ඇතුළු ඇතැම් කොටස්වල මතය වී තිබෙන්නේ.
තමා ප්‍රජාතාන්ත්‍රික සමාජවාදියකු ලෙස හඳුන්වාගන්නා සෙනට් සභික බර්නි සැන්ඩර්ස් වටා සැලකිය යුතු අනුගාමිකයන් පිරිසක් පහුගිය කාලයේ එක් වුණා. ඉන් වැඩි පිරිසක් තරුණ වයසේ අයයි. 2016 ජනාධිපතිවරණයේ දී ඩිමොක්‍රටික් පක්ෂ නාමයෝජනා වෙනුවෙන් කළ සටනේදී ඔහු හිලරි ක්ලින්ටන්ට පරාජය වුණා. පක්ෂය තුළින්ම ඔහුගේ ඡන්ද ව්‍යාපාරය කඩාකප්පල් කෙරුණ බවටත් තොරතුරු පසුව අනාවරණය වුණා.
සැන්ඩර්ස් විසින් ඇති කළ ප්‍රබෝධය සමග ඩිමොක්‍රටික් සෝෂලිස්ට්ස් ඔෆ් ඇමරිකා (ඇමරිකාවේ ප්‍රජාතාන්ත්‍රික සමාජවාදීන්) නම් ප්‍රබල සංවිධානයක් පවා නිර්මාණය වී තිබෙනවා. මෙය බොහෝ කලකින් ඇමරිකාවේ නිර්මාණය වුණු ප්‍රබල වාමවාදී සංවිධානය ලෙස අවිවාදයෙන් නම්කළ හැකියි.
මෙවර ජනාධිපතිවරණ නාමයෝජනා සටනේදී ද ජෝ බයිඩන්ට සැන්ඩර්ස් පරාය වීම සමග ඩිමොක්‍රටික් පක්ෂය තුලින්ම ඔහුගේ ඡන්ද ව්‍යාපාරය කඩාකප්පල් කළේ යන සැකයක් මතු වුණා.
No comments:
Post a Comment