ඊශ්‍රායලය සහ එක්සත් අරාබි එමීර් රාජ්‍යය අතර රාජ්‍ය තාන්ත්‍රික සබඳතා ස්ථාපිත කිරීමේ එකඟතාවක් ඇතිවූ බව ඇමරිකානු ජනාධිපති ඩොනල්ඩ් ට්‍රම්ප් අගෝස්තු 13 වනදා නිවේදනය කළා.
එක්සත් අරාබි එමීර් රාජ්‍යය මෙම එකඟතාවට එළඹුණේ බටහිර ඉවුරේ ජෝර්දාන් නිම්නය සහ යුදෙව් ජනාවාස ප්‍රදේශ ඈඳා ගැනීමට වන සැලසුම් අත් හිටුවීම සඳහා ඊශ්‍රායලය කැමැත්ත පළ කිරීම සමග බව ට්‍රම්ප් කියා සිටිනවා.
රාජ්‍ය තාන්ත්‍රික සබඳතා පිළිබඳ මේ එකඟතාව ඊශ්‍රායල අගමැති බෙන්ජමින් නෙතන්යාහු, එක්සත් අරාබි එමීර් රාජ්‍යයේ අබුඩාබි හි කිරුළ හිමි ශෙයික් මොහොමඩ් බින් සයෙද් අල් නහ්යාන් කුමරු හා තමා අතර ඇති කරගනු ලැබුණ බවයි ජනාධිපති ට්‍රම්ප් කියා සිටියේ.
මේ අනුව එක්සත් අරාබි එමීර් රාජ්‍යය ඊශ්‍රායලය සමග තානාපති සබඳතා ස්ථාපිත කරන තුන්වන අරාබි රාජ්‍යය වනු ඇති. මීට පෙර 1979 දී ඊජිප්තුව ද 1994 දී ජෝර්දානය ද එම පියවර ගත්තා.
ස්ථිර තානාපති කාර්යාල විවෘත කිරීම පිළිබඳ මෙන්ම ආයෝජන, සංචාරක කර්මාන්තය, ගුවන් ගමන්, ආරක්ෂාව යනාදී ක්ෂේත්‍රවල එකඟතා ගිවිසුම් පිළිබඳ ද සාකච්ඡා කිරීමට මෙම රටවල් දෙකේ නියෝජිතයින් නුදුරේදීම හමුවනු ඇතැයි ට්‍රම්ප් කියා සිටියා.
එමෙන්ම තවත් මුස්ලිම් රාජ්‍යයන් ද ඊශ්‍රායලය සමග තානාපති සබඳතා ස්ථාපිත කරගැනීමේ ඉඩක් ඇති බවට ද ට්‍රම්ප් ඉඟි පළකළා. මුස්ලිම් රාජ්‍යයන් සමග සබඳතා වර්ධනය කරගැනීම කෙරෙහි තමන්ද වැඩි අවධානයක් යොමු කරන්නේ යයි ඊශ්‍රායලය ද ප්‍රකාශ කර තිබෙනවා.
සෞදි අරාබියේ ඔටුන්න හිමි මොහොමඩ් බින් සල්මාන් කුමරු ද මීට පෙර ඊශ්‍රායලය සමග සාකච්ඡා කිරීමට තමන්ගේ ඇති උනන්දුව අඟවා තිබෙනවා.
කෙසේ වෙතත් එක්සත් අරාබි එමීර් රාජ්‍යය විසින් ගත් මෙම පියවර පලස්තීනුවන්ගේ දැඩි දෝෂදර්ශනයට හේතු වී තිබෙනවා.
ඊශ්‍රායලය සමග අරාබි රටවල් ඇතිකරගනු ලබන මෙම එකඟතාවන් පලස්තීනයට මෙන්ම කලාපීය වශයෙන් ඉරානයට ද හානිකර වනවා.
No comments:
Post a Comment