ඇමරිකාවේ ඩිමොක්‍රටික් පක්ෂ ජනාධිපති අපේක්ෂක ජෝ බයිඩන් තම උප ජනාධිපති තරග සගයා මෙම සතිය තුළ ප්‍රකාශ කිරීමට නියමිතයි.
ඔහු උප ජනාධිපති සගයා ලෙස කාන්තාවක නම් කරන බව පොරොන්දු වී තිබෙනවා. මේ අතර කළු ඇමරිකානු කාන්තාවක එම තැනට පත් කරන ලෙස ද ඉල්ලීමක් තිබෙනවා.
බයිඩන් විසින් නම් කිහිපයක් සලකා බලන බවත් ඒ අතර කළු ජාතික කාන්තාවන් සිව් දෙනෙකු ද වන බවත් වාර්තා වුණා. එමෙන්ම බයිඩන් තමන් විසින් සලකා බලන අවසන් කිහිප දෙනා සමග සාකච්ඡා කිරීම මේ වනවිට ද පටන්ගෙන තිබෙනවා.
 |
| ජෝ බයිඩන් (Getty Images) |
මීට පෙර වරෙක ඔහු කියා සිටියේ තම උප ජනාධිපති සගයා තමන් සමග එක්ව වැඩ කිරීමට හැකි, ඕනෑම වෙලාවක ජනාධිපති ලෙස වගකීම බාරගත හැකි අයකු වියයුතු බවයි. ඇය විදේශ ප්‍රතිපත්ති පිළිබඳ විශේෂ වූ ප්‍රවීණත්වයක් සහිත වීම අවශ්‍ය නැති බව බයිඩන් පවසනවා. ඊට හේතුව එය බයිඩන්ට හුරුපුරුදු ක්ෂේත්‍රයක් වීමයි.
බයිඩන්ගේ තෝරාගැනීමට ඇතුලත් අවසන් කිහිප දෙනා අතර සෙනට් සභික කමලා හැරිස්, හිටපු ජාතික ආරක්ෂක උපදේශක සූසන් රයිස් සහ කොන්ග්‍රස් සභික කැරන් බාස් ආදීන් වන බවයි වාර්තා වන්නේ.
 |
| කමලා හැරිස් |
සැන් ෆ්‍රැන්සිස්කෝවේ පළමු කළු ජාතික කාන්තා දිස්ත්‍රික් නීතිවේදී ලෙස කමලා හැරිස් අපරාධ මැඩීම පිළිබඳ දැඩි ප්‍රතිපත්ති ගන්නා අයකු ලෙස නමක් දිනාගත්තා. එහෙත් ඇයගේ ඇතැම් ක්‍රියාකාරකම් විවේචනයට හේතු වී තිබෙනවා. 2016 දී කැලිෆෝර්නියාවෙන් සෙනට් සභාවට තේරී පත්වූ ඇය ඉතා දැඩි අයකු මෙන් සැලකෙනවා. කැලිෆෝර්නියාව කොහොමත් ඩිමොක්‍රටික් ප්‍රාන්තයක් වන හෙයින් ඇයගේ තෝරාගැනීම ප්‍රාදේශීයව වෙනසක් ඇති නොකරනු ඇති. එමෙන්ම අපරාධ මැඩීම සඳහා ගන්නා ක්‍රියාමාර්ගවල ප්‍රතිසංස්කරණ අවශ්‍ය යයි තර්කයක් මතුවන යුගයක කමලා හැරිස් සුදුසු උප ජනාධිපති තරගකරුවකු ද යන්න ගැටළුවක්.
 |
| වැල් ඩෙමිංග්ස් |
ෆ්ලොරීඩා ප්‍රාන්තය නියෝජනය කරන කොන්ග්‍රස් සභික වැල් ඩෙමිංග්ස් ද බයිඩන් විසින් සලකා බලනු ලබන්නේය යන්න වාර්තා වී තිබුණා. ඇය ද 27 වසරක් ඕර්ලැන්ඩෝවේ පොලිස් දෙපාර්තමේන්තුවේ සේවය කළා. වසර හතරක් එහි ප්‍රධානියා ද වූ ඇය එකල තුල එම ප්‍රදේශයේ අපරාධ සියයට හතලිහකින් පමණ අඩු කිරීමට දායක වුණා. ෆ්ලොරීඩා ප්‍රාන්තය තීරණාත්මක තරගයක් තිබෙන ප්‍රාන්තයක් වන හෙයින් ඩෙමිංග්ස් වැන්නකු තෝරාගැනීම බයිඩන්ට අමතර වාසියක් වනු ඇති.
 |
| වොරන් |
බයිඩන් සමග ඩිමොක්‍රටික් ජනාධිපති නාමයෝජනාව උදෙසා සටන් කළ එලිසබෙත් වොරන් ද සලකා බලන්නන් අතර වන්නේ යයි වාර්තා වුණා. වොරන් මධ්‍ය වාමාංශික ඡන්ද ලබාගැනීමේදී වැදගත් වන්නට ඉඩ තිබෙනවා. විශේෂයෙන් බර්නි සැන්ඩර්ස්ගේ ආධාරකරුවන් වොරන් වැන්නකු පිළිබඳ සතුටු වීමේ ඉඩක් තිබෙනවා.
 |
| ග්‍රෙච්ටන් විට්මර් |
මිචිගන් ආණ්ඩුකාර ග්‍රෙච්ටන් විට්මර් කෝවිඩ්-19 වසංගතයට එරෙහිව කරන සටනත් සමග ජාතික මට්ටමෙන් ද කැපී පෙනෙන්නට වුණා. ඇය වසංගතය පාලනයට ගත් දැඩි පියවර දක්ෂිනාංශික කණ්ඩායම් සමහරක විරෝධයන්ට හේතු වුණා. එයින් ඩිමොක්‍රටික් කඳවුරේ ඇගේ නම ප්‍රචලිත වුණා. මිචිගන් යනු 2016 දී ට්‍රම්ප්ගේ ජයග්‍රහණයට ඉවහල් වූ ප්‍රාන්තයක් වීම එහි වැදගත්කම තවත් ඉස්මතු කරනවා.
 |
| ටැමී ඩක්වර්ත් |
බයිඩන් විසින් සලකා බලන තවත් අයකු ලෙස වාර්තා වූ ටැමී ඩක්වර්ත් සුවිශේෂී චරිතයක්. ඇය ඉරාකයේදී යුධ හමුදා හෙලිකොප්ටරයක් පදවමින් සිටියදී කැරලිකරුවන් ඊට පහර දුන්නා. ඇයට දෙපා අහිමි වුණා. නමුත් ඇය හමුදා සේවයේ තවත් කලක් සිටිමින් ලුතිනන් කර්නල්වරියක ලෙස විශ්‍රාම ගත්තා. පසුව ඇය ඔබාමා පාලනයේ හමුදා විශ්‍රාමික කටයුතු නියෝජ්‍ය ලේකම්වරියක ලෙස පත්වුණා.
කොන්ග්‍රස් සභාවට පත් වූ ඇය 2016 දී සෙනට් සභාවට තේරී පත් වුණා. ඇය කොන්ග්‍රස් සභාවේ පළමු තායි-ඇමරිකන් කාන්තා සාමාජිකාවයි. එමෙන්ම කොන්ග්‍රස් සභාවට පත් වූ දෙපා අහිමි පළමු කාන්තාවයි. 2018 දී ඇය සෙනට් මන්ත්‍රීවරියක ව සිටින අතර දරුවකු බිහිකළ පළමු ඇමරිකන් කාන්තාව බවටත් පත්වුණා.
 |
| කැරන් බාස් |
කැලිෆෝර්නියා ප්‍රාන්තයෙන් කොන්ග්‍රස් සභාවට පත් වූ කැරන් බාස්, උප ජනාධිපති ස්ථානය පිළිබඳ ප්‍රකාශ වෙද්දී මුලින් එතරම් ඇසුණ නමක් නොවේ. එහෙත් ඒ නම දිගටම ඇසෙමින් තිබෙනවා. විශේෂයෙන්ම "බ්ලැක් ලයිව්ස් මැටර්" උද්ඝෝෂණ රැල්ල සමග කළු ජාතික අපේක්ෂිකාවකට තැන ලැබෙනු ඇතැයි යන මතය සමග ඇය වැදගත් සාධකයක් වනවා.
 |
| ටැමී බෝල්ඩ්වින් |
මේ අයට අමතරව, විස්කොන්සින් ප්‍රාන්තය නියෝජනයකරන ටැමී බෝල්ඩ්වින් පිළිබඳ ද ඇසෙමින් තිබෙනවා. ඇය සෙනට් සභාවට පත්වූ පළමු විවෘත ලෙස සමරිසි තැනැත්තියයි. තවද විස්කොන්සින් ප්‍රාන්තය 2016 දී ට්‍රම්ප් විසින් ජයගැනීම ද මෙහිදී වැදගත් සාධකයක්.
 |
| සූසන් රයිස් |
ඇරිසෝනා ප්‍රාන්තය නියෝජනය කරන සෙනට් සභික කර්ස්ටන් සිනේමා, නිව් මෙක්සිකෝ ආණ්ඩුකාර මිෂෙල් ලුජාන් ග්‍රිෂාම්, ජෝර්ජියා ප්‍රාන්තයෙන් කොන්ග්‍රස් සභාවට තරග වදින ස්ටේසි ඒබ්‍රම්ස් ඇට්ලන්ටා නගරාධිපතිණිය වන කෙයිෂා ලාන්ස් බොටම්ස් ආදී තවත් නම් කිහිපයක් ද බයිඩන් විසින් සලකා බලන බව වාර්තා වුණා. මේ අතර සූසන් රයිස් ද කණින් කොණින් ඇසෙන ඉතා වැදගත් නමක් බව පෙන්වා දියයුතුයි. කෙසේ වෙතත් ඇයගේ ප්‍රවීණත්වය ඇත්තේ ජාතික ආරක්ෂාව හා විදේශ ප්‍රතිපත්ති කෙරෙහියි. රයිස්ට වාසියට ඇති කරුණ නම් ඔබාමා පාලන සමයේ සිටම ඇය හා බයිඩන් අතර ඇති අවබෝධයයි.
No comments:
Post a Comment