රුසියාවෙ රාජ්‍ය ලාංඡනයේ රාජාලින් යුවළක් සිටිනවා ඔබ දැක ඇති. මේ රාජාලි යුවළ මුලින්ම රුසියානු රාජ්‍ය ලාංඡනය සඳහා යොදාගෙන තියෙන්නෙ 1497 දි. එවකට මොස්කව් හි කුමාරයා හෙවත් ආදිපාදවරයා වූ තුන්වන ඉවාන්ගෙ සමයේ, ඔහුගේ රාජකීය මුද්‍රාව සඳහා මෙසේ මෙවන් ලාංඡනයක් යොදාගෙන තිබෙනවා.
මෙම ලාංඡනය මුලින්ම තෝරාගන්න ඇත්තෙ ඔස්ට්‍රියාවෙ හැප්ස්බර්ග් රාජවංශයේ ලාංඡනය අනුසාරයෙන් බව හිතන්න පුළුවන්. එමගින් මොස්කව් පාලනයට ප්‍රබලත්වයක් සහ පිළිගැනීමක් ආරෝපණය කරන්න උත්සාහ කරන්න ඇති බවයි සැලකෙන්නේ. හැබැයි මෙය සියයට සියයක් තහවුරු කරන්නට අපහසු කරුණක්.
කෙසේ වෙතත් මෙම ලාංඡනය පිළිබඳ පසුව ගොඩනැගුණ පැහැදිලි කිරීම තමයි මේ රාජාලින් දෙදෙනාගෙන් රෝමය හා බයිසන්තියම, එනම් බටහිර හා නැගෙනහිර රෝම අධිරාජ්‍යයන් සංකේතවත් වෙනව කියන කරුණ. මොස්කව් නගරය ඕර්තඩොක්ස් ක්‍රිස්තියානින් විසින් "තුන්වන රෝමය" ලෙස සැලකීම මෙම අර්ථ ගැන්වීමට හේතු වුණා.
රාජාලින් දෙදෙනාගේ ලාංඡනය විවිධ වෙනස්කම් සමග දිගටම භාවිතා වුණා. රාජවංශයන් පවා වෙනස් වෙද්දි ඒ මූලික ලක්ෂණය වූ රාජාලින් දෙදෙනා රාජ්‍ය ලාංඡනයේ රැඳී සිටියා.
1857 අප්‍රේල් 11 වන දා, ත්සාර් දෙවන අලෙක්සන්දර් අද පවතින ස්වරූපයෙන් මෙම ලාංඡනය සම්මත කළා. එය 1917 වනතුරු භාවිතා වුණා. සෝවියට් රුසියාව බිහි වීමත් සමග එය භාවිතයෙන් ඉවත් කෙරුණා. මොස්කව් ක්‍රෙම්ලිනයේ ඇතැම් කුලුනු මුදුනේ මෙම රාජාලි සලකුණ තිබුණ අතර ඒවා ස්ටාලින් විසින් ඉවත් කරවනු ලැබුණා. ඉන්පසු කුලුනු පහක මුදුනේ රතු තරු සවි කෙරුණා.
සෝවියට් දේශය කඩා වැටුණ පසු නැවත රාජාලි දෙදෙනාගේ ලාංඡනය භාවිතාවට පැමිණ තිබෙනවා. ක්‍රෙම්ලීනයේ ලෙළදෙන රුසියානු ධජයෙහි රාජාලින් දෙදෙනාගේ රාජ්‍ය ලාංඡනය දකින්න පුළුවන්. එමෙන්ම ඒ ආසන්නයේ පිහිටි රාජ්‍ය ඉතිහාස කෞතුකාගාරයේ ඉහළ ද එම රාජ්‍ය ලාංඡන දෙකක් සවි කර තිබෙනවා.
Pic - රාජ්‍ය ඉතිහාස කෞතුකාගාරය මුදුනේ සිටින රාජාලි දෙදෙනාගේ සංකේතය.
No comments:
Post a Comment