රස්පුටින්ව මරා දමන්න මූලික පියවර ගන්නෙ ෆීලික්ස් යුසූපෆ් කියන කුමාරයා. ඔහු තව කීප දෙනෙක් ඊට හවුල් කරගන්නවා. ඒත් අදහස ඔහුගෙ. සිද්ධිය වෙන්නෙ ඔහුගෙ නිවසේ.
ඔහු පසු කලෙක ලිව්ව විදියට ඔවුන් රස්පුටින්ට සයනයිඩ් දැමූ කේක් කන්න දෙනව. වයින් බොන්න දෙනව. ඒත් රස්පුටින් මැරෙන්නෙ නෑ. පස්සෙ යුසූපෆ් ඔහුට වෙඩි තියනව. ඒ පිරිස අතරෙ ඉන්නව දොස්තර කෙනෙක්. ඔහු කියනව රස්පුටින් මැරිලා කියල. පස්සෙ වෙලාවක රස්පුටින් වැටිල ඉන්න තැනින් නැගිට යුසූපෆ් වෙත කඩා පනිනව. කට්ටිය ආයෙ වෙඩි තියල ඔහුව මැඩ පවත්වනව. පස්සෙ නෙවා ගඟෙහි අතු ගංගාවකට දානව.
යුසූපෆ් මෙහෙම ලියන්නෙ රස්පුටින් මිනිසෙකු නොව යක්ෂයකු බව පෙන්වන්න. පස්සෙ ඔහු කියනව තමන් සාතන් සමග සටන් කරලා දිනුවා කියල.
රස්පුටින්ගෙ සිරුර ගොඩගෙන දින කීපයකට පසු කටකතාවක් යනව ඔහුගෙ පෙනහළුවල වතුර තිබ්බා කියල. ඒ කියන්නෙ ගඟට දාද්දිත් ඔහුට පණ තිබ්බා කියල. මේක අදටත් තියෙන කතාවක්. ඒත් ඒ සිද්ධිය වෙච්ච අලුත පත්තර වාර්තාවල ඔහුගෙ මරණ පරීක්ෂණය ගැන ලියද්දි ශරීරයේ විෂ හෝ පෙනහළුවල වතුර හෝ තිබ්බ බව වාර්තා කරල නැහැ. මේ කතා පතුරවල තියෙන්නෙ රස්පුටින් මිනිහෙක් නොව යක්ෂයෙක් හෝ සාතන් හෝ කියල පෙන්වන්න. යුසූපෆ් මෙයින් අදහස් කළේ තමන් වීරයෙක් කියල පෙන්වන එක.
හැබැයි දැන් කතාව වෙනස් මානයක් අරගෙන. අද වෙද්දි රුසියාවෙ ඕර්තඩොක්ස් ආගමික ජාතිකවාදීන් මේ ව්‍යාජ කතාවම අරන් රස්පුටින්ව වීරයෙක් කරලා.
යුසූපෆ් කියන්නෙ රදළයෙක්. ඒ වගේම ද්විලිංගික ආකර්ශණය (bisexual) තිබ්බ, ගැහැණු ඇඳුම් අඳින්න කැමති (crossdresser) අයෙක්. ආගම් නොඇදහූ අයෙක්. රස්පුටින් කියන්නෙ ගොවියෙක්. ධාර්මික ඕර්තඩොක්ස් ලබ්ධිකයෙක්. රස්පුටින්ව වීරයා කරන අය කියන්නෙ යුසූපෆ් කියන අනාගමික, විෂම ලිංගික ප්‍රවණතා තිබ්බ මනුස්සයට රස්පුටින්ව මරන්න අච්චර අමාරු වුණේ රස්පුටින් හොඳ ආගම් භක්තියකින් යුක්ත වූවකු නිසා කියල.
ඉතිහාස කතා වෙනස් වෙන හැටි.
* රස්පුටින් ඇත්තටම මියගියේ වෙඩි පාරවල් තුනකින්. එකක් ඉතා ආසන්නයේ සිට නළල මැදට තිබ්බ වෙඩිල්ලක්.
(මේ කරුණු උපුටා ගත්තෙ ඩග්ලස් ස්මිත්ගෙ Rasputin පොතෙන්)
No comments:
Post a Comment