රාජ්‍ය නායකයින්ට හෝ දේශපාලන නායකයින්ට සිටිය යුත්තේ වන්දිභට්ට උපදේශකයින් නොව සත්‍යය පවසන උපදේශකයින්. ඒ අතින් රුසියාවේ ත්සාර් පළමුවන අලෙක්සන්දර් වාසනාවන්තයෙක්. ඔහු සිය බාල සහෝදරිය වූ එකැතරීනා පව්ලොව්නා හෙවත් කැතීෂේ වෙත බොහොම සමීප වූ බව ප්‍රකට කරුණක්. ඇය දේශපාලන කටයුතුවලදී ඔහුගේ ප්‍රමුඛතම උපදේශිකාවක් වුණා. ඒ වගේම ත්සාර්ට තමන්ට පෙනෙන දේ නොපැකිළව කියන්නට ඇයට හැකියාව තිබුණා.
නැපෝලියන්ගේ හමුදා 1812 දී රුසියාව ආක්‍රමණය කරද්දී රුසියන් ජෙනරල්වරු දෙපැත්තකට බෙදුණා. යුධ ඇමති මෙන්ම හමුදා ප්‍රධානියා වූ මිහායිල් බාර්ක්ලේ ඩි ටොලී කුමාරයා විශාල ප්‍රංශ හමුදාව හමුවේ පසුබසින්න වුණා. එහෙත් ජෙනරාල් බග්‍රතියෝන් හිටියේ සටන් කළ යුතුයි කියන තැන. ස්මොලෙන්ස්ක් සටනින් පස්සෙ රුසියන් හමුදා පසුබසිද්දී හමුදා නිල ඇඳුම අඳින්නට පවා ලජ්ජා බව බග්‍රතියෝන් කියා සිටියා.
මේ දෙපාර්ශවයේ ජෙනරල්වරු වඩා සුදුසු යුධ උපක්‍රමය ගැන තීරණයක් ගන්න බැරුව පැටලෙද්දී කැතීෂේ දොස් කිව්වේ ත්සාර්ටයි. අලෙක්සන්දර් සිය ජෙනරාල්වරුන් පාලනය කරගන්නේ නැති නිසා සහ තීරණයක් ගන්නේ නැති නිසා තත්ත්වය අවුල් වූ බව ඇය පැවසුවා. මේ අවස්ථාවේ අලෙක්සන්දර් කියා සිටියේ තමන් හමුදාව පුද්ගලිකව මෙහෙයවන බවයි.
"හමුදාවට අවශ්‍ය වන්නේ එහි චිත්ත ධෛර්යය නැංවිය හැකි අයෙක්. ඔබට එය කිසිසේත් ම කළ නොහැකියි" කැතීෂේ පැවසුවා.
මේ අනුව තමයි කුමක් කළ යුතුද කියන සාකච්ඡාව ඇතිවුණේ. අලෙක්සන්දර් ජෙනරාල්වරුන් හා කරපු කතාබහේදි හැම කෙනෙක්ම පාහේ කියුවේ මිහායිල් කුතූසොෆ්ට හමුදාව භාර දිය යුතු බවයි. අලෙක්සන්දර් කුතූසොෆ්ට අකමැති හෙයින් ඔහුව කොන් කර දමලායි තිබුණේ. එහෙත් මේ අවස්ථාවේ ඔහුට හමුදාව භාර ගන්නැයි කියන්නට අලෙක්සන්දර්ට සිදුවුණා.
කැතීෂේ තම සහෝදරයාව වර්ණනා කරන වන්දිභට්ට සොයුරියක් වුණා නම් ඒ වතාවේ රුසියාව නැපෝලියන් හමුවේ පරාද වෙනවා නිසැකයි.
කැතීෂේ නැපෝලියන් පිළිබඳ කතාවට තවත් අයුරකින් ද සම්බන්ධ වෙනවා. නැපෝලියන් සිය අධිරාජිණිය වූ ජොසෆින් ව දික්කසාද කර අලුත් විවාහයක් කරගැනීමට රජ කුමරියක් සොයද්දී ඔහුගේ අවධානය කැතීෂේ වෙත යොමු වුණා. මේ කාලෙ, 1807 ටිල්සිට් ගිවිසුමෙන් පසු රුසියාව සහ ප්‍රංශය මිත්‍රයින් වී සිටි සමයයි. කෙසේ වෙතත් නැපෝලියන්ට ඇයව විවාහ කර දෙන්න රොමානොෆ් පවුලට අවශ්‍ය වුණේ නෑ. ඇගේ මව හෙවත් මාතෘ අධිරාජිණිය වහ වහා තමන්ගෙ බෑණනුවන් කෙනෙකු වූ ඔල්ඩන්බර්ග් හි ජෝර්ජ් ආධිපාදවරයාට ඇයව විවාහ කර දුන්නා. ඔවුන් ජීවත් වුණේ ත්වේර් නගරයේ. කැතීෂේගේ දෙවනි දරුවා උපන්නේ නැපෝලියන්ගේ ආක්‍රමණය දිනවලයි.
ඔල්ඩන්බර්ග් හි ආධිපදවරයා ඉන් මාස කිහිපයකට පසු 1812 දෙසැම්බරයේ මියගියා. ඉන්පසු ගතවූ වසර කිහිපයෙදි කැතීෂේ සිය සොහොයුරු පිරිසට තවත් සමීප වුණා. වියානා සංගමය පැවැත්වෙන දිනවල ත්සාර් අලෙක්සන්දර් සමග ඇය එහිද ගියා. 1816 මුලදී වුටෙම්බර්ග් හි විලියම් කුමාරයා හා විවාහ වීමෙන් පසු ඇය එරටෙහි ජීවත් වෙන්නට ගියා. විලියම් කුමාරයා ඒ වසරේම රජ බවට පත්වුණා. ඇය රෝගී තත්ත්වයක් හේතුවෙන් 1819 දී මියගියා.
No comments:
Post a Comment