බෙලරූස් උද්ඝෝෂකයන් භාවිතා කරන සුදු-රතු-සුදු ධජය

මේ දිනවල බෙලරූස් රාජ්‍යයේ ජනාධිපති අලෙක්සන්දර් ලුකාශෙන්කෝට එරෙහිව දැවැන්ත විරෝධතා පවතිනවා. මේ විරෝධතාවල දර්ශන නරඹද්දි ජනතාව භාවිතා කරන සුදු-රතු-සුදු ධජයක් දකින්න ලැබෙනවා. මෙය දැනට භාවිතා වන බෙලරූස් ජාතික ධජය නොවෙයි. අපි බලමු මේ ධජය කුමක්ද කියලා.

Pic: Reuters

බෙලරූස් උද්ඝෝෂණවල පසුබිම දැනගන්න මේ ලිපිය කියවලාම ඉන්න: බෙලරූස් රටේ සිදුවන දේ

වර්තමාන බෙලරූස් රාජ්‍යය පිහිටි ප්‍රදේශය අතීතයේදී ලිතුවේනියා මහාධිපාද ප්‍රදේශයට සහ පෝලන්ත - ලිතුවේනියා පොදුරාජ්‍ය මණ්ඩලයට අයත් වුණා. පෝලන්ත - ලිතුවේනියා පොදුරාජ්‍ය මණ්ඩල ධජය ද සුදු සහ රතු වර්ණයෙන් යුතු වුණා. බෙලරූස් සුදු-රතු-සුදු ධජය එය අනුසාරයෙන් නිර්මාණය වූයේ යයි විශ්වාස කෙරෙනවා.

බෙලරූස් රාජ්‍යයේ මෙම ධජය මුලින්ම භාවිතා වුණේ 1918 දි. එකල එම ප්‍රදේශයේ පිහිටුවපු බෙලරූස් මහජන සමූහාණ්ඩුව නම් රජය විසින් එය භාවිතා කළා. මෙම ප්‍රදේශය එකළ ජර්මන් පාලනය යටතේ තිබුණත් මෙම රජය පිහිටුවාගැනීමේ අපේක්ෂාව වුණේ බෙලරූස් රාජ්‍යයක් නිර්මාණය කරගැනීමයි. කෙසේ වෙතත් බෝල්ෂවික් බලය වර්ධනය වීම හමුවේ එම ප්‍රදේශ රතු හමුදා යටතට පත්වීමෙන් මෙම උත්සාහය ව්‍යර්ථ වුණා.

පළමු ලෝක යුද්ධය හා දෙවන ලෝක යුද්ධය අතර කාලසීමාවේ නැගෙනහිර පෝලන්තයේ ක්‍රියාත්මක වෙච්ච බෙලරූස් සංවිධාන මෙම ධජය භාවිතා කළා. මේ අතර බෙලරූස් සෝවියට් සමාජවාදී සමූහාණ්ඩුව තමන්ගෙ ධජය විදියට විවිධ ධජ භාවිතා කළා. ඒවා සෝවියට් ධජය මත පදනම්ව නිර්මාණය වූ ධජයන් වුණා.

1939 දි සෝවියට් හමුවා විසින් නැගෙනහිර පෝලන්තය අල්ලාගැනීමත් සමග මෙම ධජය එහි භාවිතය නැවතුණා. එහෙත් 1941 දි ජර්මනිය විසින් බෙලරූස් ප්‍රදේශය අල්ලාගත් පසු යළි මෙම ධජයට ඉඩ ලැබුණා. ඒ වගේම ජර්මන් හමුදාවට හා වෆන් SS බලකායට සම්බන්ධ වූ බෙලරූස් පිරිස් මෙම ධජය සහිත අත් පටියක් පැළඳ සිටියා.

1944 දි බෙලරූස් ප්‍රදේශය සෝවියට් සේනාංක විසින් අල්ලාගත් පසු නැවත මේ ධජය තහනම් වුණා. ඉන්පසු එය භාවිතා කළේ පිටුවහල් වී සිටි බෙලරූස් ජාතිකවාදීන් විසින් පමණයි. මේ අතර, 1951 දී බෙලරූස් සෝවියට් සමාජවාදී සමූහාණ්ඩුව සඳහා නව ධජයක් හඳුන්වා දෙනු ලැබුණා.

1991 දී සෝවියට් දේශය බිඳ වැටෙන සමයේ නැවත මෙම ධජය භාවිතයට පැමිණියා. ඒ අනුව 1991 සිට 1995 දක්වා එම ධජය බෙලරූස් හි ජාතික ධජය ලෙස භාවිතා කෙරුණා.

අලෙක්සන්දර් ලුකාශෙන්කෝ 1994 දී බලයට පැමිණි පසු ඔහු විසින් 1951 දී සම්මත වූ සෝවියට් බෙලරූස් ධජය අනුසාරයෙන් නිර්මාණය වූ ධජයක් හඳුන්වා දුන්නා. එය 1995 දී භාවිතයට පැමිණියා.

Pic: AP

මේ හේතුවෙන්, ලුකාශෙන්කෝ විරෝධීන් සිය උද්ඝෝෂණවලදී භාවිතා කරන්නේ බෙලරූස් සුදු-රතු-සුදු ධජයයි.

ඇතැම් අවස්ථාවල මෙම ධජයෙහි මැද, රතු පළිහක සුදු පැහැයෙන් අඳින ලද අසරුවකුගේ සංකේතයක් ද දැක්වෙනවා. එය ද 1918 බෙලරූස් රාජ්‍යයේ රාජ්‍ය ලාංඡනය වූ සලකුණයි. එය පැරණි ලිතුවේනියා මහාධිපාද ප්‍රදේශයේ රාජ්‍ය ලාංඡනය ද වුණා.