පිරමිඩ් හැදුවෙ පිටසක්වලයින් බව පැවසීමට හේතු

ටෙස්ලා ආයතනයේ ප්‍රධාන විධායක වශයෙන් ඊලොන් මස්ක් නවීන තාක්ෂණික ලෝකයේ පෙරළිකාරයකු බවට පත්වී තිබෙනවා. ඔහු විසින් සිදුකරන ඕනෑම ප්‍රකාශයක් දෙස විශාල අවධානයක් යොමුවීම ස්වාභාවික කරුණක්. මෑත දිනෙක ඔහු සිය ට්විටර් ගිණුම ඔස්සේ කළ වචන කිහිපයක ප්‍රකාශයක් මගින් පිරමීඩ නිර්මාණය කළේ පිටසක්වල ජීවීන් බව සඳහන් කළා. මේ වචන කිහිපය විශාල විවාදයකට මුල පිරුවා.

Pic: Getty Images

ඊජිප්තුවේ පෞරාණික උරුමය පිළිබඳ හිටපු රාජ්‍ය අමාත්‍යවරයකු සහ ඊජිප්තු උරුමයන් පිළිබඳ ලෝ ප්‍රකට විද්‍යාර්ථියෙකු වන ආචාර්ය සාහි හවාස් ඊලොන් මස්ක් වෙත දැඩි දෝෂාරෝපණයක් එල්ල කළා. පිරමීඩ පිටසක්වල ජීවීන් විසින් කරන ලද්දක් නොවන බව සනාථ කෙරෙන කරුණු ද ගෙනහැර දක්වමින් ඔහු ප්‍රබල ප්‍රහාරයක් මස්ක් වෙත එල්ල කළා.

මේ අතර ඊජිප්තුවට පැමිණ එහි සොහොන් ගෙවල් හා ඒ සම්බන්ධ ලේඛණ පරීක්ෂා කර බලන ලෙස එරට ජාත්‍යන්තර සහයෝගීතා ඇමතිණී රානියා අල් මෂාට්, ඊලොන් මස්ක් වෙත ආරාධනාවක් ද කර තිබෙනවා.

ඊජිප්තු පිරමීඩ නිර්මාණය කළේ පිටසක්වලයින් බවට කියන මතය කලක් තිස්සේ මතු වන්නක්. මේ බව තහවුරු කිරීමට ඇතැම් අවස්ථාවල ඉදිරිපත් කරන සාධක ද සත්‍යතාවයෙන් තොරයි. උදාහරණයක් ලෙස ගත්තොත් පිරමීඩයක ගල් දෙකක් අතරින් කඩදාසියක් යැවීමට පවා නොහැකියි කියන ප්‍රකාශය වැනි අතිශයෝක්ති සහිත කතා ඇතැම්විට පුවත්පත්, සඟරා ආදියේ ද පළ වනවා.

ඊජිප්තු ඉතිහාසය මනාව අධ්‍යයනය කළොත් මෙම පිරමීඩවල පරිණාමය සිදුවූ ආකාරය පෙනී යනවා. ගීසාහි මහා පිරමීඩවල ඈතට බැලූ බැල්මට​ පෙනෙන සුමට බව මුල් කාලීන පිරමීඩවල නැහැ. ඒවායේ ඇත්තේ පියවර වශයෙන් ඉහල නැගෙන ආකෘතියක්. ලෝකයේ ගලින් නිර්මිත පළමු ගොඩනැගිල්ල ලෙස සැලකෙන ෆාරාඕ ජෝසර්ගේ පිරමීඩය (ක්‍රි.පූ. 2667-2648) තමයි එහි මුල් අවස්ථාව වන්නේ. එය තමයි කාලය ගතවීමේදී වඩා සුමට වෙලා, විශාල වෙලා නිර්මාණය වන්නේ. එය පියවරෙන් පියවර සිදුවූ සංවර්ධනයක් මිස එක රැයින් සිදු වෙච්ච දෙයක් නොවේ. ඊජිප්තුවේ තියෙන විවිධ පිරමීඩ දිහා බලද්දි ඒ විවිධ පරිණාමික අවස්ථා පැහැදිලිව පෙනෙන්න තියෙනවා. (අනාගතයේ දවසක ඒ ගැන වෙනම ලියන්න බලාපොරොත්තු වෙනවා).

ජෝසර්ගේ පිරමීඩය​ (Getty Images)

මෙවැනි ආකාරයෙන් කරුණු පැහැදිලිව පෙනෙන්න තිබියදී ඊලොන් මස්ක් පිරමීඩවල ගෞරවය පිටසක්වල ජීවීන් නම් අප දැක නැති කොට්ඨාශයක් වෙත දෙන්නේ ඇයිද යන්න ප්‍රශ්නයක්.

පුද්ගලිකව ඊලොන් මස්ක් මෙවැන්නක් ප්‍රකාශ කරන හේතුව පැහැදිලි නැතත් බටහිර රටවල පිරිස් මෙම කරුණ උලුප්පා දැක්වීමට පොදු හේතුව තෝරා බේරා ගන්න අපහසු නැහැ.

පිරමීඩ නිර්මාණය කළේ සුදු මිනිසුන් නොවන බව බොහොම පැහැදිලිව පෙනෙන්න තිබෙනවා. ග්‍රීකයන්ට පෙර ඊජියන් මුහුදු ප්‍රදේශවල ජීවත් වූවන් සුද්දන් ලෙස පෙන්නුම් කරගන්නට බටහිර රටවල අයට හැකිවෙලා තියෙනව.  ඒ නිසා පැරණි ඊජියානු ප්‍රදේශවල නිර්මාණයන් ගැන ඔය වගේ කතා එතරම් ජනප්‍රිය කරවන්න අවශ්‍ය වෙලා නැහැ. නමුත් ඊජිප්තුව සම්බන්ධව මේ අයට ප්‍රශ්නයක් තියෙනව. ඒ සා දැවැන්ත නිර්මාණයක් සුදු ජාතික නොවන ජනතාවක් විසින් කළාය කියන දේ පිළිගන්න වගේම වෙන අය එය පිළිගන්නවා දකින්න ඒ අය අකැමැතියි. ඒ නිසා තමයි ඔය පිටසක්වල කතා කරළියට එන්නෙ.

මේ අය සුද්දන් හදපු නැති හැම නිර්මාණයක්ම පිටසක්වල ජීවීන්ගෙ ගිණුමට බැර කරන්න උත්සාහ කරයි. අන්තිමට බලද්දි ඒවා සේරම කරල තියෙන්නෙ පිටසක්වලයො. අනුරාධපුරයේ දාගැබ් ආදී ලෝකය වටා තියෙන වෙනත් ඇතම් නිර්මාණ ගැනත් මේ වගේ ප්‍රවාද ගොඩනගන උත්සාහයන් අපි දැකල තියෙනව.

මේ විදියෙ මනස්ගාත ප්‍රචාරය කරන සියල්ලන්ම බටහිර රටවල අය නොවේ. මේ අය අතරෙ ඕනතරම් ඒ ඒ රටවල අයත් ඉන්න පුළුවනි. බොහෝ දෙනෙක් මෙවැනි අදහස් ප්‍රචාරය කරන්නෙ එක්කො නොදන්නකම නිසා. එක්කො නොදන්නකම එක්ක එන අරුම පුදුම දේ ගැන, ඉන්ද්‍රජාල දේ ගැන තියෙන නැඹුරුව නිසා. එක්කො නොදන්නකම එක්ක එන පරගැතිකම නිසා. ප්‍රසිද්ධ පුද්ගලයෙක් කිව්ව පළියට යමක් විශ්වාස කරන එකත් එහෙම පරගැතිකමක් තමයි. එතනදි තමයි ඊලොන් මස්ක්ලා වැදගත් වෙන්නෙ.

මේ කියපු හේතු සියල්ලෙම මහා පොදු සාධකය වෙන්නෙ නොදන්නකම තමයි. ඊජිප්තු පිරමීඩවල විකාශනය පියවරෙන් පියවර දැක්ක අයෙක් මේ මනස්ගාත කීයටවත් පිළිගන්නෙ නැහැ.