Saturday, September 5, 2020

උතුරු කොරියාවේ කිම් ජොංග්-උන්ගේ සහෝදරිය කිම් යෝ-ජොංග්

උතුරු කොරියානු නායක කිම් ජොංග්-උන්ගේ අනුප්‍රාප්තිකයා වියහැකි යයි විශේෂයෙන්ම බටහිර ඇතැම් මාධ්‍ය විසින් මතු කර පෙන්වන කිම් යෝ-ජොංග් තවමත් 32 වන හෝ 33 වන වියෙහි පසුවන කාන්‍තාවක්. කිම් ජොංග්-උන්ගේ සෞඛ්‍යය තත්ත්වය පිළිබඳ විවිධ සැක සංකා මතුවන හෙයින් කිම් යෝ-ජොංග් ඊළඟ උතුරු කොරියානු නායකයා වනු ඇතැයි ඇතැමුන් අනුමාන කරනවා.

1987 හෝ 1988 දී උපන් බව විශ්වාස කෙරෙන කිම් යෝ-ජොංග් උතුරු කොරියාවේ දෙවැනි නායකයා වූ කිම් ජොංග්-ඉල්ගේ බාලම දරුවා යි. ඇය සහ ඇගේ සහෝදර කිම් ජොංග්-උන් යන දෙදෙනාම ස්විට්සර්ලන්තයේ අධ්‍යාපනය ලද බවයි කියවෙන්නේ.

Pic: AP

කිම් යෝ-ජොංග් බාහිර ලෝකයේ බොහෝ දෙනා අතර කතාබහට ලක්වන අයකු වුණේ 2018 පෙබරවාරි මාසයේදී දකුණු කොරියාවේ පැවති සිසිර ඔලිම්පික් උළෙලේ සමාරම්භක උත්සවයට සහභාගී වීම සඳහා පැමිණීමත් සමගයි. එහිදී ඇය දකුණු කොරියානු ජනාධිපති මූන් ජේ-ඉන් හමුවී අතට අත දෙන අවස්ථාවෙහි ඡායාරූප ජාත්‍යන්තර මාධ්‍යවල පළවුණා.

එයින් පසුව ගතවූ මාස කිහිපය උතුරු කොරියානු රාජ්‍ය තාන්ත්‍රික කටයුතුවල අලුත් නැඹුරුවක් පෙන්නුම් කළා. 2018 අප්‍රේල් 27 වනදා උතුරු කොරියාවේ සහ දකුණු කොරියාවේ නායකයින් හමුවීම, කිම් ජොංග්-උන් හා චීන ජනාධිපති ෂී ජින්පිං හමුවීම මෙන්ම කිම් ජොංග්-උන් හා ඩොනල්ඩ් ට්‍රම්ප් අතර 2018 ජූනි 12 සිදුවූ ඓතිහාසික හමුව මේ මාස කිහිපය තුළ සිදුවුණා. මේ සියල්ලේදී ම කිම් යෝ-ජොංග් සිය සහෝදරයා සමග ඊට සහභාගී වුණා. එමෙන්ම ඊටත් වඩා වැදගත් වැඩකොටසක් ඇය සිදුකළ බවයි වාර්තා වුණේ. විශේෂයෙන්ම දකුණු කොරියානු ජනාධිපති මූන් ජේ-ඉන් සමග සම්බන්ධය පවත්වාගෙන ගියේ ඇය බව විශ්වාස කෙරෙනවා. එය කිම්-මූන් හමුවට මෙන්ම කිම්-ට්‍රම්ප් හමුවට ද වැදගත් වුණා.

නමුත් කිම් යෝ-ජොංග් මේ ආකාරයෙන් බාහිර ලෝකය හමුවේ පෙනී සිටීම හේතුවෙන් බාහිර ලෝකයේ බොහෝ දෙනෙක් ඇයට සත්‍ය වශයෙන්ම නැති වැදගත්කමක් ආරෝපණය කර තිබෙන බවක් පෙනී යනවා. ඇය සිය සහෝදරයාගේ අනුප්‍රාප්තිකයා යයි සඳහන් කළත් ඇයට නිල වශයෙන් විශාල බලයක් හිමිව නැහැ. ඇය 2014 සිට උතුරු කොරියානු ප්‍රචාරක දෙපාර්තමේන්තුවේ නියෝජ්‍ය ප්‍රධානියා වූ අතර 2017 දී කොරියානු කම්කරු පක්ෂයේ දේශපාලන මණ්ඩලයේ අර්ධකාලීන සාමාජිකාවක ලෙස පත් කෙරුණා. මෙය එහි පූර්ණ සාමාජිකත්වය ලබාදීමට පෙර ලැබෙන පරිවාස කාලයක් වැන්නක්. කෙසේ වෙතත් 2019 දී හැනෝයි නගරයේ සිදුවූ කිම්-ට්‍රම්ප් හමුව අසාර්ථක වීමෙන් පසු ඇයව එයින් ඉවත් කෙරුණා. නායකයාගේ අනුප්‍රාප්තිකයාට එසේ කරනු ඇතැයි සිතිය නොහැකියි. ඇයව ආපසු දේශපාලන මණ්ඩලයේ අර්ධකාලීන සාමාජිකයකු ලෙස පත් කළේ 2020 අප්‍රේල් මාසයේ යි.

කිම් යෝ-ජොංග් විවාහ වී සිටින්නේ කොරියානු කම්කරු පක්ෂ ලේකම් චෝයි රියොංග්-හේ ගේ පුත්‍රයකු සමග බව කියවෙනවා. එය මගින් ඇයට අමතර බලයක් ලැබෙනු නොඅනුමානයි. කෙසේ වෙතත් තමුන්ගේ තනි හැකියාව මත හෝ කිම් පවුලේ සාමාජිකාවක වීම මත උතුරු කොරියාවේ බලය ඇයට ලැබේද යන්න සැක සහිතයි. උතුරු කොරියාවේ රජය මෙහෙයවන ජුචේ දර්ශනය වඩාත් ආසන්න වන්නේ මාක්ස්වාදයට වඩා සම්ප්‍රදායික කොරියානු හර පද්ධතීන්ට යි. එහෙයින් කාන්තාවක රාජ්‍ය නායකත්වයට පත්වීම සිදුවීමේ ඉඩකඩ ඉතා අඩුයි.

මේ තත්ත්වය වෙනස් කරන්නට හැකියාව ඇති ප්‍රධානම තැනැත්තා ඇගේ සහෝදරයායි. මෑත කාලයේදී කිම් යෝ-ජොංග් වෙත අමතර රාජ්‍ය වගකීම් පැවරුණ බව වාර්තා වුණත් එය තහවුරු වූයේ නැහැ. තවමත් කිම් ජොංග්-උන් සිය සහෝදරිය තම අනුප්‍රාප්තිකයා ලෙස පත් කිරීමට අවශ්‍ය පසුබිම ප්‍රමාණවත් ලෙස සකසා නැති බවයි පෙනී යන්නේ. එය දිගු කාලීන සැලසුමක් සහිතව සෙමින් සිදුවන්නක් වීමට ඉඩ තිබෙනවා. එහෙත් කිසියම් අයුරකින් කිම් ජොංග්-උන්ගේ සෞඛ්‍ය තත්ත්වය හදිසියේ අයහපත් වුවහොත් කිම් යෝ-ජොංග් බලයට පැමිණේ යයි හෝ එසේ බලයට ආවත් එය දිගු කාලීනව රැකගනී යයි හෝ ස්ථිරව කිව නොහැකියි.

No comments:

Post a Comment