ජෝර්දාන රජ පවුලෙහි සාමාජිකයන් ඇතුළු විසි දෙනකු පමණ අත් අඩංගුවට ගන්නාලද පුවත මීට අය කිහිපයකට පෙර එරට රජයේ පුවත් සේවය වන පෙට්‍රා ආයතනය මගින් නිවේදනය කෙරුණා.
රජ පවුලේ සාමාජිකයකු වන හසන් බින් සයිද්, දෙවන අබ්දුල්ලා රජුගේ සමීපයකු වන බාසම් ඊබ්‍රහීම් අවදල්ලාහ් සහ තවත් නම සඳහන් නොකළ පිරිසක් අත් අඩංගුවට ගනු ලැබ තිබෙනවා.
එමෙන්ම හිටපු කිරුළ හිමි කුමරු මෙන්ම දෙවන අබ්දුල්ලා රජුගේ අර්ධ සහෝදරයා වන හම්සා බින් අල්-හුසේන් මෙන්ම ඔහුගේ මව වන නූර් රැජිණ ද රඳවාගන්නා ලද බවයි වාර්තා වූයේ. හම්සා බින් අල්-හුසේන් කුමරු සැටලයිට් තාක්ෂණය ඔස්සේ පවසා සිටියේ තමන් නිවාස අඩස්සියට පත්කරනු ලැබ ඇති බවයි.
ඔහුට ජාතික ආරක්ෂාවට බාධා වන අයුරින් කටයුතු නොකරන ලෙස දැඩි ලෙස අවවාද කෙරුණ බව පෙට්‍රා ආයතනය පැවසුවා.
මෙම අත් අඩංගුවට ගැනීම්වලට හේතුව දෙවන අබ්දුල්ලා රජුබලයෙන් නෙරපා හැරීමට කුමන්ත්‍රණයක් සිදුවෙමින් පැවතීම බවයි සැක කෙරෙන්නේ. මෙම මාළිගා කුමන්ත්‍රණය පිටුපස විදෙස් හස්තයක් ඇති බවට ද සැක මතුවෙමින් පවතිනවා.
මෙම මාළිගා කුමන්ත්‍රණය මෑතකාලීනව ඊශ්‍රායලය සහ අරාබි රටවල් අතර සබඳතා පුළුල් වීමේ පසුබිමෙහි අරාබියේ බල තුලනය එහා මෙහා කිරීමේ උත්සාහයක් වියහැකි යයි සැක මතුව තිබෙනවා.
බාසෙම් අවදල්ලාහ් කලක් ජෝර්දානයේ ආර්ථික කටයුතු ඇමතිවරයා ද වූ අතර ඔහුට අරාබියේ අන් රටවල ද ව්‍යාපාරික සබඳතා තිබෙනවා.
1999 දී හුසේන් රජුගේ අභාවයෙන් පසු රජකමට පැමිණි දෙවන අබ්දුල්ලා රජු බටහිරට සමීප ප්‍රතිපත්ති අනුගමනය කරන්නෙක්. කෙසේ වෙතත් මෑත කාලයේ ඔහුගේ රජය විසින් සිවිල් නිදහස සීමා කරන බවට චෝදනා මතුවුණා. විශේෂයෙන්ම කොරෝනා වෛරසය හේතුවෙන් පනවන ලද සීමා උපයෝගී කරගෙන විරුද්ධවාදීන් මර්ධනය කරන බවට රජයට එරෙහිව චෝදනා එල්ල වනවා.
1999 සිට 2004 වසර වනතෙක් ජෝර්දානයේ කිරුළ හිමි කුමරුවා වූයේ හම්සා බින් අල්-හුසේන් කුමරුයි. පසුව දෙවන අබ්දුල්ලා රජු විසින් තම පුත්‍රයාව එම තනතුරට පත්කරනු ලැබුණා.
No comments:
Post a Comment