දෙවන ලෝක යුධ සමයෙන් අනතුරුව කොමියුනිස්ට් පාලනය නැගෙනහිර යුරෝපයේ රටවල් කිහිපයකටම ව්‍යාප්ත වුණා. මේ අතරින් එක් රටක් වුණේ පෝලන්තය යි. සෝවියට් හමුදාවන්හි සහ එහි සහය ලද පෝලන්ත කොමියුනිස්ට් හමුදාවන්හි බලපෑමෙන් පෝලන්තයේ කොමියුනිස්ට් රජයක් බිහිවුණා.
නැගෙනහිර යුරෝපයේ බොහෝ රටවල මෙන්ම පෝලන්තයේ ද කොමියුනිස්ට්වාදීන් මුලින්ම සිය ප්‍රතිවාදීන් මර්ධනය කළා. පසුව කොමියුනිස්ට් පක්ෂය තුළම සිටි ස්ටාලින්වාදී සෝවියට් ක්‍රමය සමග අනුගත නොවූවන් මර්ධනය කළා. කොමියුනිස්ට්වාදය පෝලන්තයට ගැලපෙන ලෙස සකස් කරගතයුතු බව විශ්වාස කළ ව්ලැඩිස්ලාව් ගොමුල්කා පෝලන්ත කම්කරු පක්ෂයේ ප්‍රධාන ලේකම් ධුරයෙන් නෙරපන ලද්දේ ද එහි ප්‍රතිඵලයක් ලෙසයි. මේ අනුව 1948 දී බොලෙස්ලාව් බේරූට් එම තනතුරට පත්වුණා.
බේරූට් පෝලන්ත නායකයා වූ පසු සෝවියට් හමුදා වැඩියෙන් පෝලන්තයේ කටයුතුවලට සම්බන්ධ කෙරුණා. පෝලන්ත හමුදා ඒකක බොහොමයක අණදෙන නිලධාරී තනතුරු සෝවියට් නිලධාරීන් වෙත ලැබුණා. නමුත් වැදගත්ම සිදුවීම වූයේ 1949 දී සෝවියට් මාර්ෂල්වරයකු වූ කොන්ස්තන්තින් රකසෝව්ස්කි පෝල්න්තයේ ආරක්ෂක ඇමති ධුරයට පත්වීමයි.
රකසෝව්ස්කිගේ පවුල පෝලන්ත රදළ පවුලක්. රකසෝව්ස්කි උපන්නේ 1896 දී, එවක රුසියානු අධිරාජ්‍යය යටතේ නාමිකව ස්වතන්ත්‍ර ප්‍රදේශයක් වූ "සංගම් පෝලන්තයේ" අගනුවර වූ වෝර්සෝ නගරයේ යි. 1914 දී රුසියානු අධිරාජ්‍යය වෙනුවෙන් හමුදාවට එක්වූ ඔහු 1917 න් පසු සෝවියට් පාලනය තෝරාගත්තා. පෝලන්තය ස්වාධීන රාජ්‍යයක් වූ පසුත් ඔහු පෝලන්තයට පැමිණියේ නැහැ.
දෙවන ලෝක යුද්ධයේ විශිෂ්ට සෝවියට් සෙන්පතීන් අතුරින් අයකු වූ ඔහු 1944 දී බග්‍රතියෝන් මෙහෙයුම සැලසුම් කරන තැන සිට සිදුකළ කාර්යයභාරය හේතුවෙන් මාර්ෂල්වරයකු බවට උසස් කෙරුණා.
1949 දී පෝලන්තයේ ආරක්ෂක ඇමති ලෙස ඔහු පත්වීම එරට තුළ සෝවියට් පාලනය පිළිබඳ පැහැදිලි සාධකයක් වුණා.
රකසෝව්ස්කිව පෝලන්ත වැසියන් දුටුවේ පෝලන්ත ජාතිකයකු ලෙස නොව රුසියානුවකු ලෙසයි. එහෙයින් ඔහු කළේ ජනප්‍රිය රාජකාරියක් නොවේ. පෝලන්ත ජාතිකයන් සහ රුසියානුවන් අතර ඓතිහාසික එදිරිවාදිකම ඉතා දිගු එකක් වූයෙන් කොමියුනිස්ට්වාදයට එය බලෙන් මර්ධනය කරනවා විනා, මුලිනුපුටා දමන්න හැකියාවක් වූයේ නැහැ.
"රුසියාවේදී ඔවුන් මා පෝලන්තකාරයකු යයි කියනවා. පෝලන්තයේදී ඔවුන් මා රුසියානුවකු යයි කියනවා" යනුවෙන් රකසෝව්ස්කි ම මේ පිළිබඳ සඳහන් කර තිබෙනවා.
1956 ජූනි මාසයේදී පෝලන්තයේ ඇතිවූ ජනතා විරෝධයෙන් අනතුරුව එරට ප්‍රතිසංස්කරණ ගණනාවක් සිදුවූ අතර සෝවියට් ඍජු අධීක්ෂණය අඩු කෙරුණා. රකසෝව්ස්කිගේ ආරක්ෂක ඇමති රාජකාරිය ද එයින් අවසන් වුණා.
No comments:
Post a Comment