ජර්මනියේ ප්‍රධාන දේශපාලන පක්ෂ​

ජර්මන් ෆෙඩරල් ජනරජයෙහි ක්‍රියාත්මක වන ප්‍රධාන දේශපාලන පක්ෂ කිහිපයකි.

Pic - DPA

ක්‍රිස්තියානි ප්‍රජාතාන්ත්‍රික එකමුතුව

(ඉංග්‍රීසි: Christian Democratic Union; ජර්මන්: Christlich Demokratische Union Deutschlands; කෙටි නම CDU)

1946 ජූනි 26 වනදා පිහිටුවන ලද මෙම පක්ෂය ජර්මනියේ ප්‍රධානම දක්ෂිනාංශික පක්ෂය වේ. කන්සර්වේටිව් හෙවත් පැරණි සිරිත් විරිත් අගයන​, ක්‍රිස්තියානි ප්‍රජාතාන්ත්‍රිකවාදී පක්ෂයක් වන මෙය ජර්මනියේ බැවේරියාව හැර අන් ප්‍රාන්තවල ක්‍රියාත්මකය​.

ක්‍රිස්තියානි සමාජ එකමුතුව

(ඉංග්‍රීසි: Christian Social Union; ජර්මන්: Christlich-Soziale Union in Bayern; කෙටි නම CSU)

ක්‍රිස්තියානි ප්‍රජාතාන්ත්‍රික එකමුතුවේ බැවේරියානු සගයා ය​. මෙම පක්ෂය ද කන්සර්වේටිව්, ක්‍රිස්තියානි ප්‍රජාතාන්ත්‍රික පක්ෂයක් වන අතර CDU පක්ෂයට වඩා කන්සර්වේටිව් පක්ෂයක් ලෙස සැළකේ.

සමාජ ප්‍රජාතන්ත්‍රවාදී පක්ෂය

(ඉංග්‍රීසි: Social Democratic Party; ජර්මන්: Sozialdemokratische Partei Deutschlands; කෙටි නම SPD)

ජර්මනියේ ප්‍රධානම වාමාංශික පක්ෂය මෙයයි. 1863 මැයි 23 වනදා පිහිටුවන ලද සමස්ථ ජර්මන් කම්කරු සංගමය මෙහි මූලාරම්භකයා වේ. සමාජ ප්‍රජාතන්ත්‍රවාදී පක්ෂය යන නම එය විසින් 1890 සිට භාවිතා කරයි.

වාම පක්ෂය

(ඉංග්‍රීසි: The Left; ජර්මන්: Die Linke; කෙටි නම LINKE)​

සමාජ ප්‍රජාතන්ත්‍රවාදී පක්ෂයට වඩා වාමාංශික දේශපාලන පක්ෂයකි. මෙය 2007 දී පිහිටුවන ලද්දේ ප්‍රජාතාන්ත්‍රික සමාජවාදයේ පක්ෂය (PSD) සහ කම්කරු සහ සමාජ සාධාරණත්වය සඳහා ඡන්දදායකයන්ගේ විකල්පය නම් වූ පක්ෂ දෙකේ එකමුතුවෙනි. මෙයින් PSD යනු නැගෙනහිර ජර්මනියේ පාලක පක්ෂය වූ සමාජවාදී එක්සත් පක්ෂයේ අනුප්‍රාප්තිකයා ය​. මෙම පක්ෂය ප්‍රධාන වශයෙන් පැරණි නැගෙනහිර ජර්මනියේ ප්‍රබලය​.

90 සන්ධානය​/හරිතවේදීන්​

(ඉංග්‍රීසි: Alliance '90/The Greens; ජර්මන්: Bündnis 90/Die Grünen; කෙටි නම GRÜNE)

සාමාන්‍යයෙන් හරිතවේදීන් (The Greens) ලෙස කියැවෙන මෙම පක්ෂය 1993 දී පිහිටුවන ලද්දේ පැරණි බටහිර ජර්මනියේ හරිත පක්ෂය සහ නැගෙනහිර ජර්මනියේ බිහිවූ 90 සන්ධානය යන පක්ෂ දෙක එකතු වීමෙනි.

නිදහස් ප්‍රජාතන්ත්‍රවාදී පක්ෂය​

(ඉංග්‍රීසි: Free Democratic Party; ජර්මන්: Freie Demokratische Partei; කෙටි නම FDP)

1948 දෙසැම්බර් 12 වනදා පිහිටවුන මෙම පක්ෂය විවෘත ආර්ථිකයට පක්ෂ​, ලිබරල්වාදී දේශපාලන පක්ෂයකි. මෙය පැරණි බටහිර ජර්මනියේ තුන්වන ප්‍රධානම පක්ෂය වූ අතර වර්තමාන ජර්මනියේද වැදගත් පක්ෂයකි. කෙසේ වෙතත් 2013 මැතිවරණයේදී ඊට සියයට 5 ජාතික ඡන්ද ප්‍රතිශත සීමාවට ළඟා වීමට නොහැකි වූයෙන් පාර්ලිමේන්තු නියෝජනය අහිමි විය​.

ජර්මනිය සඳහා විකල්පය​

(ඉංග්‍රීසි: Alternative for Germany; ජර්මන්: Alternative für Deutschland; කෙටි නම AfD)

2013 පෙබරවාරි 6 වනදා පිහිටුවන ලද ජර්මනිය සඳහා විකල්පය අන්ත දක්ෂිනාංශික​, ජාතිකවාදී පක්ෂයකි.

මීට අමතරව ජර්මනියේ අනෙකුත් පක්ෂ අතර නව​-නට්සිවාදී පක්ෂයක් ලෙස සැළකෙන ජර්මන් ජාතික ප්‍රජාතන්ත්‍රවාදී පක්ෂය, පයිරට් පක්ෂය සහ තවත් කුඩා පක්ෂ ගණනාවක් වේ.