ජර්මන් හරිත පක්ෂය පළමු වරට ජනප්‍රියම දේශපාලන පක්ෂය බවට පත්වෙයි

ජර්මනියේ පවත්වන ලද සමීක්ෂණයකදී පළමු වරට එරට හරිත පක්ෂය අන් දේශපාලන පක්ෂ සියල්ල අභිබවා ඉදිරියට පැමිණ තිබෙනවා.

Bild am Sonntag පුවත්පත වෙනුවෙන් Kantar ආයතනය විසින් සිදුකළ "ඉරිදා ප්‍රවණතා" සමීක්ෂණයේදී හරිත පක්ෂය සියයට 28 ක ජනප්‍රියත්වයක් පෙන්නුම් කළා. මෙය කලින් සතියට වඩා සියයට හයක් ඉදිරියට පැමිණීමක් වනවා.

බෙයර්බොක් සහ මර්කල් (DPA)

චාන්සලර් ඇන්ගෙලා මර්කල්ගේ CDU/CSU සන්ධානය සියයට 27 ක ජනප්‍රියත්වයක් පෙන්වන අතර සමාජ ප්‍රජාතන්ත්‍රවාදී පක්ෂය සියයට 13 ක ජනප්‍රියත්වයක් පෙන්වනවා.

අන්ත දක්ෂිනාංශික ජර්මනිය සඳහා විකල්පය පක්ෂය සියයට 10 ක ජන ප්‍රසාදයක් ලබාගනිද්දී අන්ත වාමාංශික "වාම පක්ෂය" සියයට 7 ක ජන ප්‍රසාදයක් වාර්තා කර තිබෙනවා. නිදහස් ප්‍රජාතන්ත්‍රවාදී පක්ෂය සියයට 9 ක ප්‍රසාදයක් වාර්තා කළා.

කියවන්න: ජර්මනියේ ප්‍රධාන දේශපාලන පක්ෂ

හරිත පක්ෂය මෙම ජනප්‍රියත්වය පෙන්නුම් කරන්නේ අන්නාලීනා බෙයර්බොක් පක්ෂයේ චාන්සලර් අපේක්ෂකයා ලෙස නම් කරන ලද පසුවයි. CDU/CSU සන්ධානය ද තම අපේක්ෂකයා ලෙස අමීන් ලැෂෙට් නම් කළේ ජනතාව අතර වඩා ජනප්‍රිය පුද්ගලයා වන CSU නායක මාර්කස් ෂ්‍යෝඩර් පසෙකට දමමින්.

මේ අතර සමාජ ප්‍රජාතන්ත්‍රවාදී පක්ෂය සිය චාන්සලර් අපේක්ෂකයා ලෙස ඔලාෆ් ෂොල්ට්ස් නම්කළා. ඔහු පසුගිය දා බෙයර්බොක් විවේචනය කළේ ඇය පරිපාලනයේ අත්දැකීම් අඩු අයකු බව ප්‍රකාශ කරමින්. දැනට උප චාන්සලර් ධුරය​ දරන ෂොල්ට්ස් පවසන්නේ ජර්මනිය වැනි විශාල කාර්මික රාජ්‍යයක් මෙහෙයවීමට සුදුසු වන්නේ තමන් වැනි පළපුරුදු අයකු බවයි. ෂොල්ට්ස් සහ බෙයර්බොක් එකම ප්‍රදේශයේ දේශපාලකයන් වන හෙයින් ඔවුන් අතර පැහැදිලි තරගයක් නිර්මාණය වී තිබෙනවා.

මේ අතර පසුගිය සතිය තුළ හරිත පක්ෂයට අලුතින් සාමාජිකයන් 2,159 ක් එක්ව ඇතැයි එම පක්ෂය සඳහන් කළා.