මෙම සංවිධානය පිහිටුවාගනු ලැබුනේ 2014 පෙබරවාරි 15 සිට 17 දක්වා පැවති අන්තර්ජාතික සමුලුවකදී ය.
මෙම සංවිධානයේ සාමාජිකයන් වන්නේ මොරිටානියාව, මාලි, බුර්කිනා ෆාසෝ, නයිජර් සහ චැඩ් ය. මෙම සියල්ල පැරණි ප්‍රංශ යටත් විජිත වේ. එහෙයින් මෙම සංවිධානය සහ ප්‍රංශය අතර සමීප සබඳතාවයක් දක්නට ලැබේ.
2014 දෙසැම්බරයේදී මෙම සංවිධානයට අයත් වන රටවල් ගිවිසුමකට එළඹියේය. එමෙන්ම සංවිධානයේ නිත්‍ය ලේකම් කාර්යාලය මොරිටානියවේ පිහිටු වීමට කටයුතු කෙරිණ.
මෙම රටවල්වල ආර්ථික දියුණුව සහ ආරක්ෂාව සඳහා එක්ව කටයුතු කිරීම පිළිබඳ මෙම සංවිධානය අවධානය යොමු කරයි. මෑත කාළයේදී ඉස්ලාමික අන්තවාදී සංවිධානවලින් එන තර්ජනයන් පිළිබඳ ද විශේෂ අවධානයක් ඔවුන් යොමු කර තිබේ. ප්‍රංශය විසින් කලාපයෙහි 5,100 ක පමණ වන හමුදාවක් මේ වනවිට නවත්වා තිබේ.
G5 සහේල් සංවිධානය ධරණීය සංවර්ධනය කෙරෙහි විශේෂ අවධානයක් යොමු කරයි. සංවර්ධන අවශ්‍යතා වන පරිපාලනය, ආරක්ෂාව, ආර්ථික ශක්තිය සහ යටිතල පහසුකම් ආදිය පිළිබඳ අවධානය යොමු කිරීම සඳහා ආයෝජන ප්‍රමුඛතා වැඩසටහන නම් වැඩ පිළිවෙලක් ද ඔවුහු අනුගමනය කරති.
No comments:
Post a Comment