1941 අප්‍රේල් 18 වනදා ග්‍රීක අගමැති අලෙක්සන්ද්‍රොස් කොරිසිස් හිසට වෙඩි තබාගෙන දිවි නසාගත්තා.
අප්‍රේල් 6 වනදා ඇරඹුණ ජර්මන් ආක්‍රමණය හේතුවෙන් ග්‍රීක හමුදා වේගයෙන් පරාජය වීම මීට හේතුව ලෙස සැලකුණා. ග්‍රීක හමුදා 1940 ඔක්තෝබරයේ ඇරඹි ඉතාලි ආක්‍රමණය සාර්ථක ලෙස මැඩ පැවැත්වූවත්, ඉතාලි ප්‍රහාර හේතුවෙන් හමුදාවේ වැඩි කොටස වූයේ ඇල්බේනියා දේශසීමාවේ යි. එහෙයින් බල්ගේරියාවේ සිට ජර්මන් සේනා ග්‍රීසියට කඩා වැදෙද්දී ඊට ප්‍රමාණවත් ප්‍රතිචාරයක් දැක්වීමට ග්‍රීක සේනා අසමත් වුණා.
1885 දී පෝරස් නම් කුඩා දිවයිනේ උපත ලද කොරිසිස් අගමැති ධුරයට පත් වූයේ 1941 ජනවාරි 29 වනදා යි. ඒ අගමැති ඉයොආන්නිස් මෙටක්සාස්ගේ මරණයෙන් පසුවයි.
ඇතැන්ස් නගරයේ කලබල ඇතිවේ යයි සැකය හේතුවෙන් කොරිසිස්ගේ මරණයට හේතුව මුලින් අනාවරණය කෙරුණේ නැහැ.
කෙසේ වෙතත් ග්‍රීසියේ දෙවන ජෝර්ජ් රජු යුධ නීතිය පනවා ඇතැන්ස් හි මහජන සාමය තහවුරු කළා. මේ අතර ජර්මන් සේනා නගරය දෙසට වේගයෙන් ඇදෙමින් සිටියා. ඔවුනට ඇතැන්ස් නුවරට ළඟාවීමට ගතවූයේ තවත් දින නවයක් පමණයි.
No comments:
Post a Comment