රුසියාවේ ත්සාර් දෙවන අලෙක්සන්දර්

1818 අප්‍රේල් 29 වනදා, මොස්කව් ක්‍රෙම්ලිනයේ කුඩා නිකුලස් මන්දිරයේදී රුසියාවේ ත්සාර් දෙවන අලෙක්සන්දර් උපත ලැබුවා. එකල රුසියාවේ ත්සාර් වූ පළමුවන අලෙක්සන්දර්ගේ බාල සහෝදරයා ද, අනාගත ත්සාර්වරයකු ද වූ පළමු නිකුලස්ගේ පුත්‍රයා වූ දෙවන අලෙක්සන්දර්, 1855 දී ත්සාර් ලෙස පත්වුණා.

මහා පීටර් විසින් රුසියාවේ අගනුවර පීතර්බුර්ග් වෙත ගෙනගිය බව ඔබ දන්නවා. 1725 න් පසු රුසියාවේ පාලනයට පත් වූ සියළු අධිරාජයින් හා අධිරාජිණියන් අතුරින් මොස්කව්වලදි උපන් අයකු වන්නේ දෙවන අලෙක්සන්දර් පමණයි. සම්ප්‍රදායිකව ත්සාර් පවුල පාස්කු නිවාඩුවට මොස්කව් පැමිණීමේ සිරිතක් වුණා. අලෙක්සන්දර් උපන්නේ එවන් අවස්ථාවකයි.

දෙවන අලෙක්සන්දර් වඩාත්ම ප්‍රසිද්ධ වන්නේ 1861 දී ප්‍රවේණිදාසයන් නිදහස් කිරීම නිසයි. එහෙයින් ඔහු "විමුක්තිදායකයා" ලෙස නම් ලැබුවා.

දෙවන අලෙක්සන්දර්ගේ ජීවිතය, ආදර කතා, ඔහු මුහුණදුන් ඝාතන ප්‍රයත්නයන් හා ඔහුගේ ඝාතනය ආදිය ගැන ලියන්න කරුණු බොහෝ තියෙනව. වෙලාවක් වුණොත් ලියන්නම්.

දෙවන අලෙක්සන්දර්ට මරණාත්මක බෝම්බ ප්‍රහාරය එල්ල වූ ස්ථානයේ සාදවන ලද දේවස්ථානය ගැන මෙතැනින් කියවන්න​: සාන්ත පීතර්බුර්ග් නගරයේ පාට පාට පල්ලිය

එලිසවෙතා අධිරාජිණියගේ තුන්කොන් ආදර කතාව

එලිසවෙතා පෙත්‍රොව්නා විවාහ වී සිටියේ නැහැ. ඇය විවාහ වන වයස ද පසුවෙමින් තිබුණා. එකල අවුරුදු 30 ඉක්මවා ගිය කාන්තාවක විවාහයට හොඳටම වයසින් වැඩි අයකු වුණා. එලිසවෙතා ඉතා සුරූපී කාන්තාවක් වුනත් විවාහ වීමේ හැකියාවක් වූයේ නැහැ.

එලිසවෙතාට ආදරවන්තයෙක් සිටියා. අලෙක්සේයි රසුමොව්ස්කි. ඔහු ගැමියෙක්. එතරම් උගත් අයකු නොවුණත් දක්ෂ අයෙක්. ඔහු ප්‍රබෝධමත්, සන්සුන් සහ විශ්වසනීය අයකු වුණා. ඇය ඔහුගේ ගම්මානයට පවා ගියා. ඔහුගේ නෑදෑ හිතමිතුරන් හමුවුණා.

රසුමොව්ස්කිට කිසිම තනතුරක් අවශ්‍ය වුණේ නැහැ. ඔහු ඇයට ඉතා පක්ෂපාතී වුණා. ඇයගේ ආරක්ෂාව පිළිබඳ වගබලා ගත්තා. ඇයට සමීපව සහකරු ලෙස සිටියා. ඔවුන් රහසේ විවාහ වූ බවත් ළමුන් ලැබුණ බවත් කියනවා. ඒත් ඒ බව තහවුරු වී නැහැ.

එලිසවෙතා ඉතා ආඩම්බර කාන්තාවක්. වයසට යද්දී ඇය තම රූපය ගැන කරදර වුණා. එවිට ඇයට සමීප වූයේ වෙනත් තරුණයෙක්. ඒ ඉවාන් ෂුවාලොෆ්. ඉවාන්ව ඇය වෙත යොමු කළේ ඔහුගේ ඥාති සොයුරන් දෙදෙනායි. එමගින් තමන්ට වාසියක් අත්කර ගැනීමයි ඔවුන්ට අවශ්‍ය වුණේ. නමුත් ඉවාන් ඔවුන්ට ඕනෑ විදියට කටයුතු කළේ නෑ. ඔහුට ද තනතුරු ආදිය අවශ්‍ය වූයේ නැහැ.

ඉවාන් එලිසවෙතාට වඩා අවුරුදු දහ අටක් ලාබාල අයෙකු වූ අතර ඔවුන් දෙදෙනා එකිනෙකා හඳුනා ගනිද්දී ඇයට වයස අවුරුදු 40 ත් ඉක්මවා තිබුණා. ඔවුන් අතර ආදර සබඳතාවක් ඇති වූයේ පසුවයි.

කෙමෙන් කෙමෙන් එලිසවෙතා, අලෙක්සේයි රසුමොව්ස්කිව ඈත් කරන්නට වුණා. ඔහු එහිදී කෝප ගත්තේ නැහැ. ඒ වෙනුවට ඔහු පසෙකට වුණා. එලිසවෙතාගේ කැමැත්තට එරෙහිව කිසිවක් කිරීමට ඔහුට අවශ්‍ය වූයේ නෑ. ඔහු එලිසවෙතාට අවශ්‍ය පරිදි ඉන්නට දී ඈත්ව ගියා.

එලිසවෙතා පෙත්‍රොව්නා වයස අවුරුදු 53 ක් වෙද්දී මියගියා. එතෙක් ඇගේ පෙම්වතා වූයේ ෂුවාලොෆ්.

මහා පීටර් අධිරජයාගේ දියණියක වූ එලිසවෙතා පෙත්‍රොව්නා යනු 1741 - 62 සමයෙහි රුසියාවේ අධිරාජිණිය යි.