සෝවියට් නායකයා "ගෙදර යැවූ" ජනප්‍රිය ගීතය

1964 දි සෝවියට් අසර්බයිජානයෙන් පැමිණි මුස්ලිම් මගමයේෆ් (Muslim Magomayev) නම් තරුණ ගායකයෙක් ජනප්‍රිය තාලයේ ගීයක් ගායනා කළා. ලෝකයේ හොඳම නගරය (Лучший город Земли) නම් වූ මේ ගීතයෙන් මොස්කව් නගරය ගැනයි කියවෙන්නේ. මේ ගීතය බෙහෙවින් ජනප්‍රිය වූ අතර සෝවියට් දේශයේ ගුවන්විදුලියෙන් නිරන්තරයෙන් එය ඇසෙන්නට වුණා.

Песня плывёт, сердце поёт,
Эти слова о тебе, Москва

"ගීතය පාවී යයි, හදවත ගී ගයයි
මේ වදන් ඔබ ගැනයි, මොස්කව්"

නමුත් සෝවියට් නායක නිකීතා කෘෂ්ශොෆ් මේ ගීතයට එතරම් ප්‍රියතාවයක් දැක්වූයේ නැහැ. මෙවන් දේශානුරාගී ආකාරයේ ගීතයකට ජනප්‍රිය (පොප්) ආරක සංගීතය එතරම් ගැලපෙන්නේ නැතැයි පැවසූ ඔහු එම ගීය වාදනය නොකරන ලෙස ගුවන්විදුලියට දැනුම් දුන්නා. මෙය රජය විසින් කළ වාරණයක් නොව කෘෂ්ශොෆ් විසින් කළ ඉල්ලීමක්.

මේ සිද්ධියෙන් පසු ගතවුණේ මාස කිහිපයක් පමණයි. කෘෂ්ශොෆ් බලයෙන් පහ කෙරුණා. ඉන් පස්සෙ මේ ගීතය ලියූ දිමිත්‍රි දර්බෙන්යොෆ් ගුවන්විදුලියට ගිහින් මේ වගේ දෙයක් පැවසුවාලු. "ඔන්න මගමයේෆ් ඔහුට හැකි දේ කළා. කෘෂ්ශොෆ් ගෙදර ගියා. දැන් අපේ සින්දුව ආපහු වාදනය කරමු නේද?"

ඇත්තෙන්ම කෘෂ්ශොෆ් බලයෙන් ඉවත් කෙරුණේ මේ ගීතය නිසා නෙවෙයි. දර්බන්යොෆ් මෙය විහිළුවක් ලෙස පැවසූ බවයි සඳහන් වෙන්නෙ. කොහොමහරි මේ ගීතය ඉන් පසුව ආපහු වාදනය වෙන්න පටන්ගත්තා.

මුස්ලිම් මගමයේෆ් පොප් සංගීතවේදියෙක් ලෙස කෙතරම් ජනප්‍රිය වුණාදැයි කිවහොත් ඇතැමුන් ඔහුව හඳුන්වන්නේ සෝවියට් එල්විස් ප්‍රෙස්ලි කියලයි. ඔහු 2008 දි මියගිය අතර ඔහුගේ සිරුර අසර්බයිජානයේ බාකු නගරයේ "ගෞරවාන්විතයන්ගේ මංපෙතේ" තැන්පත් කෙරුණා.

එසේ නම්, "ලූත්ෂි ගෝරද් සිම්ලී" ගීතය මේ ලින්ක් එකෙන් අහන්න.