දකුණුදිග ශාන්තිකර සාගර ප්‍රදේශයේ පිහිටි වර්ග කිලෝමීටර් 12,189 ක් විශාල, දූපත් 83 කින් පමණ සමන්විත, ජනගහනය 300,000 ක් පමණ වන වනුවාටු රාජ්‍යය අද සිය 40 වන නිදහස් දිනය සැමරුවා.
වනුවාටු වැසියන්ට මේ වෙනුවෙන් ජූලි 23 සිට දින නවයක දිගු නිවාඩුවක් ලැබී තිබෙනවා.
යටත් විජිත සමයේ නිව් හෙබ්‍රඩීස් නමින් හැඳින්වූ වනුවාටු දූපත් හි කොටසක් බ්‍රිතාන්‍යය සහ අනෙක් කොටස ප්‍රංශය විසින් පාලනය කෙරුණා. එයින් පසු එම රටවල් දෙකම එකතු වී එය පාලනය කළා. 1970 දශකයේ එරට ජාතික නිදහස් ව්‍යාපාරයක් දියත් වූ අතර එහි ප්‍රතිඵලයක් ලෙස 1980 දී එරටට නිදහස ලැබුණා.
වනුවාටු රාජ්‍යයේ නිල භාෂා වන්නේ බිස්ලාමා, ඉංග්‍රීසි හා ප්‍රංශ යන භාෂා යි. මීට අමතරව තවත් ස්වදේශික භාෂා 113 ක් පමණ එහ වනවා. එනම් රටේ ජනගහනයෙන් සෑම 2500 කට පමණ එක් භාෂාව බැගින් වන තරම් භාෂා ඝනත්වයක් එහි තිබෙනවා. එහෙයින් ලොව ඉහළම භාෂා ඝනත්වයක් ඇති රාජ්‍යය ලෙසයි වනුවාටු සලකනු ලබන්නේ.
වනුවාටු රාජ්‍යය වර්තමාන කෝවිඩ්-19 වසංගතයෙන් ගැලවී සිටීමට මෙතෙක් සමත්ව සිටිනවා. එහෙත් එම වසංගතය හේතුවෙන් සංචාරක කර්මාන්තය කඩා වැටීම එරටට බරපතල ප්‍රශ්නයක් වනවා නොඅනුමානයි.
වනුවාටු රාජ්‍යයට අතීතයේදී ආධාර උපකාර ලැබුණේ ඔස්ට්‍රේලියාව, නවසීලන්තය, බ්‍රිතාන්‍යය සහ ප්‍රංශය යන රටවලින්. පසුව බ්‍රිතාන්‍යය මෙම කලාපයේ කටයුතුවලින් ඈත් වීමේ ප්‍රතිඵලයක් ලෙස ඔවුන් එරටට ආධාර ලබාදීම නැවතුණා. මේ අතර ඇමරිකාව එම අඩුව පිරවීමට දායක වුණා. වර්තමානය වනවිට චීනය වනුවාටු රාජ්‍යයට ණය සහ ආධාර විශාල වශයෙන් ලබා දෙනවා. රටේ දෙවන විශාලම නගරය වන ලූගන්විල් හි විශාල වරායක වැඩ සිදුවනවා. එතරම් විශාල වරායක අවශ්‍යතාව වනුවාටු රාජ්‍යයට නැහැ. එහෙයින් එය අනාගතයේදී හමුදාමය අවශ්‍යතා උදෙසා චීනය විසින් ගොඩ නංවන ලද්දේ යයි සැක මතු වනවා. ණය ගෙවාගත නොහැකිව රට කෙමෙන් චීන බලපෑමට හසුවන බවක් පෙනී යනවා.
No comments:
Post a Comment